Žuolinės-Žlėbėnūs-2024-08-15
Po Švėntūm Mišiūm skubiejuom švėntė švėstė. Uors fantastinis, žmuonis poike nusiteikė, dalyvava moila vielėma i krežiū pynėma edukacijuos. Diekou Ramute i Vytarou, už edukacėju pravedėma i Žlėbėnūm bėndruomene, už tūm edukacijū finansavėma.
Šaškiu turnyrs užsitėsė ypatinga ėlga, nes susirinka tėkri pruofa i nenoriejė ni vėins tep lėngva atidoutė tuos galimuos pergalės taškūm, tai varžies ligi sutemūm. Jaunima kateguorijuo I vėita laimiejė Nuojus Mikuckis, II vėita džiaugies Antuonijus Stančiks i III vėita atiteka Tavijou Čekavičiou. Suaugusiųjų lyguo mūšis bova aršesnis i praktėška pusiaunaktie paaiškiejė, ka I vėita atiteka Ričiardou Valužiou, II vėita – Romualdou Kubiliou, i III vėita – Andiou Mikuckiou, i IV vėitas atiteka mūsa parapėjės konigou Donatou i kontautėškiou Kaziou Pakalnėškiou.
Sėniūnėje kap kuožnas metas apdovanuojė i šimeta gražiausiu sodybū tris gaspaduorius, – Viganta i Raimonda Kučinskius, Asta i Lina Juškas, Laura i Artūra Jucius.
Gėliūm I Žolynū dekoraciju kūriejė ėrgi bova vėsi lig vėina apdovanuoti, įsteigtas Liuda Čiuželė prizas, vo pagrindėnis prizus isteigts Konferencijų ir laisvalaikio centras „Porto” atiteka žlibinėške Inga Čiuželiene.
Porvatiū medžiuotuoju būrielis pasistėngė, ka vėsi pakaštavuotom ont laužūm vėrtuos ognėnės šiūrpas su mėška meselė. Diekou vyrams (Vadou Artūrou Vainauskiou, pavaduotojou Česlovou Kerpauskiou, Rolandou i Lukou Leliuguoms, Tadeliou i Andriou Petreikiou) už ton gera smuoka pasakė kikvėins pakaštavuojės anūm gamybas šedevra.
Koncertinė pruograma pri Žemynas skulptūras pradiejė Žlėbėnūm kultūras centra teatra grupė, su sava režisierė Liucija Bertulienė. Dekavuojem Rūta Čuželiene ož tam teatra pasiruodymou iškepta rogėniū mėltū doenelė, katra bova pavaišynti vėsi susirinkusėje i švėntė, ka ni vėinam nieka netrūktom ligi sekontiu metu derliaus nujėmėma. Sava gražiausės dainas vėsyms susirinkusyms dovanuojė Žlebėnūm vakūm vokalinis ansamblis VAIKYSTĖ (vaduovė Lolita Liaudanskienė), Glaudžiūm muotrėšku vokalinis ansamblis DRAUGYSTĖ (vaduovs Kęstutis Kazlauskis), Kontautiū muotrėšku vokalinis ansamblis RUGIAGIELĖS (vaduovė Laima Duomarkienė), mėšrus vokalinis ansamblis SAULĖS GRAŽA (vaduovė Rita Urniežienė) i liaudėškas mozikas kapela RIVIENA (vaduovs Alfreds Lučinks).
No vo šuoktė ligi parytiūm, vėsus kvėitė atlikies Gintars Sabeckis, Gedimins Jokubauskis i Kristina su Aidu. Nažėnau brongėje kap šindėin jums, bet mums kuojės nu šuokėma skaud, ligu būtom arkle suspardė, bet šėrdis džiaugsma psalmės gėid, nes vėskas pavyka, kap i bova planouta, net sukaupu, nes nesitikiejuom tėik daug žmoniūm pamatytė Žlėbėnūm kultūras cėntra kėimelie Žuoliniū švėntės metu, ka unt rytuojaus (no patėkslyntė rektom, kai kuryms šokiejems ton pati dėina) vėsyms reikietė kėltė i darbus.
Dėdelis diekou garsistou Vėktorou Mėtkou už tuobula garsa i apšvėitėma, diekou Šateikiū kultūras cėntrou už scena, vo Vytautou Galminou už anuos atvėlkėma. Diekou vėsuoms muotriškuoms katruos pėlnuom terbuom neprašytas atmuovė priš švėntė 5 valonduom onkstiau ka paruoštom vaišės atlikiejems, tai Rita Urniežienė, Irena Smagurienė i Daivelė Danilevičienė. Diekou i kėtuoms sukruovusiuos skaniūm jėdalūm pėlnus krežius, tai Genutė Pučkoriutė, Greta Brazdeikytė, Vilija Biliauskienė, Inga Bumblauskaitė.
Susirinkusiūs pasveikyntė su gražiausė vasaras gala švėntė, atvyka i seima narys Juons Varkalys i Plungės mers Audrius Klišuonis.
Vo patius dėdeliausius padėkuos žuodius nuoru pasakytė tyms žmonyms be katrūm net nebūtom ta švėntė ivykusi vėsai, nes nepavyka laimietė ni vėina projektinė finansavėma. Tai padieka už kaimūm palaikyma, supratingoma i dosnoma diekavuoju LITNAGLIS direktoriou Mindaugou Bondauskiou, PLUNGĖS SVEIKATOS CENTRAS direktore Irena Nekrašiene i anuos sūnou Juliou Nekrašou, STRATEGAS direktoriou Aidou Kiesou, PIENO GĖLĖ direktoriou Raimondou Jorkou, nes anūm vėsūm dieka bova užpėrkti batuta nemuokama šieltė vėsyms vakams, i Gedimina Jokubauska, i Kristinas su Aidu koncertinės pruogramas.
Žuodžiu, – be žuodžiu. Diekou vėsyms didėliausis, jūs vėsi esi nuostabūs.
